La primer illustración de les dos que van incluise na segunda entrega de La Otra Cara de Morgana de la escritora castrillonense Helena Seoane. Esta autora tresllada al oriente d’Asturies la lleenda artúrica que, amás, ye narrada dende’l puntu de vista de Morgana.
La primer entrega d’esta orixinal historia asoleyóse en formatu cómic, onde les illustraciones yeren del artista avilesín Nacho Suárez, pero esti segundo volume va ser una novela illustrada na qu’aporto esta Morgana Durmiente y otra más que ta en procesu. La previsión ye qu’esta segunda entrega de La Otra Cara de Morgana te llista pa depués del branu.
El mío collaciu Edgar Max, gran dibuxante de cómics, convidóme a sofitar la so campaña de crowdfunding d’El Camino Pagano, un proyeutu nel qu’andecharon un garrapieyu de los meyores dibuxantes del estáu (xente como Max Hierro, Sergio Bleda, Tomás Hijo,Jordi Zapata, Javier Prado…).
El Camino Pagano ye un llibru que ta a caballu ente la llibreta de viaxes y el sketchbook, una obra illustrada na qu’Edgar Max propón un percorríu per esi borrinosu llugar que conocemos como el norte,de Hondarribia a Fisterra cola mirada fixa na relación del home y la mar. El pasáu balleneru, les traxedies marítimes d’estes peligroses costes, les lleendes y tradiciones de la xente que trabayaba na mar…
El Gaviluetu
Pa participar n’El Camino Pagano escoyí faer una illustración basada nuna lleenda de la franxa de la costa ente L.luarca y Cuideiru, la lleenda del Gaviluetu que yá trescribiera Jesús Evaristo Casariego hai 90 años. Dizse que nuna playa d’esa parte de la costa oicidental d’Asturies trescurrieron los amores d’un capitán vikingu con una serena, de los que ñació un neñu que siempre destacara poles sos dotes pa l’oficiu de la mar y al que se-y dio’l nomatu d’El Gaviluetu. Esi talentu pa la mar y tamién pa la guerra, llevólu a comandar les naves asturianes que participaron na toma de Llisboa, onde tuvo un papel destacáu que-y valió pa ganase’l drechu a casar con una infanta de Portugal, una neña de güeyos verdes como la mar. La historia dame coartades abondes pa remanar ellementos nórdicos na illustración, como la decoración del barcu o poner de fondu un ægishjálmur islandés.
Esta selmana preséntase n’Avilés, nel marcu del Celsius232 d’Avilés, la novela ganadora del II Premiu Radagast: La Vieya d’Aique Fernandi.
En La Vieya, Aique Fernandi anova la imaxe de la mitoloxía asturiana llevándola a los sos raigaños y, al empar, a los nuestros díes. Desendolcándose la narración nuna Asturies que podemos imaxinar a unos pocos quilómetros d’Uviéu o Xixón, onde pervive una mitoloxía rural yá cuasi escaecida por nós. La portada d’esta interesante novela inclui una de les míos illustraciones onde pretendí espeyar, en parámetros célticos, una adaptación de Les 3 Edaes de la Muyer de Klimt.
La Vieya ta editada por Radagast y podéis mercala equí
Nun sabéis la gran ilusión que me fae entamar esta nueva estaya como illustrador firmando’l cartelu de la nueva edición del Cáceres Irish Fleadh, que ye’l mayor eventu dedicáu a la música tradicional irlandesa que se fae n’España y que va cellebrase en malapenes 2 meses del 22 al 24 de setiembre. Los que me conocéis persabéis de les míos aficiones y zunes y el folk célticu ye de les mayores y tamién una de les grandes fontes d’inspiración pa’l mío trabayu.
El trabayu amestáu partes feches a mano y trabayu dixital. Equí enriba podéis ver l’encanezáu del cartelu emulando la caligrafía de los llibros medievales irlandeses y, tamién, abelluga una referencia a l’Asociación El Gato al Agua que’entama esti festival (na C podéis alcontrar un mixín célticu tirándose al agua)… Pero la gran protagonista d’esti trabayu ye una flautista, a la que yo llamo Moira Malospelos, cola que pretendo rendir homenaxe a les muyeres de la música tradicional (el XIX de la camiseta de Moira ye poles XIX ediciones del festival).
vitorgonzalez.art.blog 