El mío collaciu Edgar Max, gran dibuxante de cómics, convidóme a sofitar la so campaña de crowdfunding d’El Camino Pagano, un proyeutu nel qu’andecharon un garrapieyu de los meyores dibuxantes del estáu (xente como Max Hierro, Sergio Bleda, Tomás Hijo, Jordi Zapata, Javier Prado…).
El Camino Pagano ye un llibru que ta a caballu ente la llibreta de viaxes y el sketchbook, una obra illustrada na qu’Edgar Max propón un percorríu per esi borrinosu llugar que conocemos como el norte,de Hondarribia a Fisterra cola mirada fixa na relación del home y la mar. El pasáu balleneru, les traxedies marítimes d’estes peligroses costes, les lleendes y tradiciones de la xente que trabayaba na mar…
Pa participar n’El Camino Pagano escoyí faer una illustración basada nuna lleenda de la franxa de la costa ente L.luarca y Cuideiru, la lleenda del Gaviluetu que yá trescribiera Jesús Evaristo Casariego hai 90 años. Dizse que nuna playa d’esa parte de la costa oicidental d’Asturies trescurrieron los amores d’un capitán vikingu con una serena, de los que ñació un neñu que siempre destacara poles sos dotes pa l’oficiu de la mar y al que se-y dio’l nomatu d’El Gaviluetu. Esi talentu pa la mar y tamién pa la guerra, llevólu a comandar les naves asturianes que participaron na toma de Llisboa, onde tuvo un papel destacáu que-y valió pa ganase’l drechu a casar con una infanta de Portugal, una neña de güeyos verdes como la mar. La historia dame coartades abondes pa remanar ellementos nórdicos na illustración, como la decoración del barcu o poner de fondu un ægishjálmur islandés.
vitorgonzalez.art.blog 